روح وقفص (باللهجة العامية لجبل العرب) شعر: هاني زريفة

روح وقفص

(باللهجة العامية لجبل العرب)

شعر: هاني زريفة

تعبانْ من حملا الجسمْ هالرّوحْ ... بكّيرْ فاضتْ منْ مَعون زغيرْ

بِتحومْ فوقي بتركا وبروحْ ... وِبْقَصْقِص جناحاتها بكّيرْ

وِبْلَمْلْم جنونا بصدرْ مجروحْ ... وبدفنْ عميق سرارها بالبيرْ

عَبْيرقص بصدري فرخ مذبوحْ ... بِضْلاعْ كَسَّرها الدَّهِرْ تكسيرْ

وتغُص دمعاتي وما فيي نوح ... ربّي خلقني مكابر وجَبِّيرْ

لوْ كنتْ عَشقان العشقْ مفضوحْ ... ولوْ كنتْ محبوب الهوى سَتّيرْ

لوْ بَسْ موجوعْ الوجعْ بيروح ... ولوْ بَسْ بالرّزق الرِّزقْ تِدبيرْ

ولوْ كانْ ناقصني سَعي وِطْموحْ ... حَجَّرِتْ غُمري ولازمتْ لسْريرْ

جاني الدَّهِرْ قللي قَبِلْ ما تروحْ ... رَحْ خَبركْ وين البختْ بيصيرْ

محظوظ! بَختكْ بالسَّما مَشلوحْ ... بَكّيرْ طِرْلو منْ قبلْ ما يطيرْ!